Is céim i dtreo cúram sláinte níos fearr in Éirinn í gach céim chun cinn sa taighde sláinte, ag soláthar nuálaíochta, cosc, costais laghdaithe, táirgiúlacht fheabhsaithe, agus feabhsú ar thaithí daoine ar chúram sláinte agus sóisialta.

Tá dul chun cinn sonraíoch feicthe againn sna blianta ó bhunaigh mo Roinn BTS 40 bliain ó shin. Ó fhorbairt cóireálacha nua agus ó athruithe bunúsacha ar chleachtas a chur chun cinn, go bealaí a chruthú chun go bhféadfaidh daoine páirt a ghlacadh i dtrialacha cliniciúla agus fianaise láidir a sholáthar chun an chaoi a gcuirimid cúram ar fáil a fheabhsú – tá ról lárnach ag BTS sa mhéid seo a chur i gcrích.

Agus bhur gcomóradh suntasach á cheiliúradh agaibh, is mór an onóir dom fáilte a chur roimh an straitéis nua seo a threoróidh ár mbealach chun cinn amach anseo. 

Tá gealltanas tugtha ag an Rialtas tacú leis an taighde i raon leathan réimsí: lena n-áirítear feabhsú ar dhiagnóis agus ar thacaíochtaí don néaltrú, ullmhacht náisiúnta don tsláinte éigeandála a neartú, an tsláinte dhigiteach agus an ghéanómaíocht a fhorbairt, líon agus cáilíocht na dtrialacha cliniciúla a mhéadú, agus díriú ar chinnteoireacht bunaithe ar fhianaise chun cothromas a chur chun cinn agus cúram sláinte níos fearr a sholáthar. 

Leagtar amach sa straitéis nua seo treochlár uaillmhianach chun taighde sláinte nuálach agus réamhghníomhach a fheabhsú, agus tá an cumas aici tacú le soláthar sna príomhréimsí seo sna blianta atá amach romhainn. Teastaíonn na coinníollacha cearta uainn chun go mbeidh rath ar thaighde agus ar nuálaíocht, agus léiríonn an straitéis seo tiomantas soiléir d’éiceachóras taighde rathúil a chruthú a thacaíonn leis an bpobal taighde. Tá sé seo ríthábhachtach mar léiríonn an fhianaise go gcuireann taighde, nuair atá sé fite fuaite i seirbhís sláinte, ar chumas soláthraithe cúraim sláinte an t-eolas agus na sonraí a bheith acu chun torthaí níos fearr a bhaint amach d’othair agus don phobal.

Le chéile, leanfaimid orainn ag cinntiú go gcloistear barúil na n-othar agus an phobail le linn tionscadal taighde, mar is trí oibriú le chéile amháin gur féidir linn torthaí nithiúla a bhaint amach.

Tríd an straitéis seo, léiríonn BTS cad is féidir a bhaint amach sa taighde sláinte má táimid uaillmhianach, comhoibríoch, agus thar aon ní eile, ag cur riachtanais an phobail, na n-othar agus na gcúramóirí chun tosaigh. Cuirfidh an cur chuige seo lenár gcumas dul i ngleic go héifeachtach le dúshláin sláinte amach anseo, cinnteoireacht a threorú, agus cúram sláinte agus sóisialta níos fearr a sholáthar do chách.