Sprioc 1
Timpeallacht rathúil taighde sláinte a chruthú
Timpeallacht agus lucht saothair taighde beoga agus ullmhaithe don todhchaí a chruthú don chúram sláinte agus sóisialta
Teastaíonn na coinníollacha cearta ó thaighde agus ó thaighdeoirí chun go n-éireoidh leo. Beidh BTS i gceannas ar fhorbairt agus ar chur i bhfeidhm éiceachórais dhinimiciúil taighde sláinte agus sonraí ar fud oileán na hÉireann. Is trí infheistíocht a dhéanamh i ndaoine, i scileanna, i gcórais agus i rialachas, agus trí thacaíocht don bhonneagar a spreagadh a bhainfear é seo amach.
Cuirfimid le forbairt lucht saothair láidir taighde agus tacóimid leis chun freastal ar riachtanais chúram sláinte agus sóisialta anois agus amach anseo, ar leibhéal náisiúnta agus domhanda, tríd an méid seo a leanas a dhéanamh:
Thacaíocht a thabhairt don chéad ghlúin eile de thaighdeoirí feidhmeacha i gcúram sláinte agus sóisialta, le béim ar chur chuige idirdhisciplíneach, trasdiciplíneach agus idirghairmiúil
Chomhoibriú a dhéanamh leis an bhFeidhmeannacht na Seirbhíse Sláinte (FSS), le hinstitiúidí ardoideachais, le comhlachtaí oiliúna gairmiúla agus le páirtithe eile chun creataí a fhorbairt agus a thacú le lucht saothair cliniciúil acadúil a chuireann deiseanna ar fáil do ghairmithe cúram sláinte agus sóisialta ag gach céim dá ngairmeacha chun oiliúint taighde agus cleachtas a chomhcheangal
Infheistíocht a dhéanamh i bhforbairt acmhainne agus cumais i réimsí ríthábhachtacha amhail bithstaitisticí, eolaíocht iompraíochta, eolaíocht an chur i bhfeidhm, modheolaíocht taighde, sintéis fianaise, agus trí thacú le scileanna na todhchaí a bhaineann leis an gclaochlú digiteach.
Cuirfimid rochtain ar ardáin agus ar bhonneagair taighde chun cinn agus ar fáil chun taighde agus nuálaíocht i gcúram sláinte agus sóisialta a neartú, tríd an méid seo a leanas a dhéanamh:
Leas a bhaint as ár dtaithí fhairsing chun bearnaí criticiúla a shainaithint agus tionchar a imirt ar mhaoinitheoirí poiblí níos mó agus ar ghníomhaireachtaí rialtais chun infheistíocht a dhéanamh i mbonneagar agus i seirbhísí taighde inbhuanaithe
Thacú le dul chun cinn agus aird a tharraingt ar Chomhlacht Rochtana Sonraí Sláinte náisiúnta (faoin Spás Eorpach Sonraí Sláinte), a chumasóidh rochtain shlán, nascadh agus úsáid sonraí sláinte chun críocha taighde agus nuálaíochta
Oibriú leis an Roinn Sláinte, leis an Roinn Breisoideachais agus Ardoideachais, Taighde, Nuálaíochta agus Eolaíochta (RBATNE) agus le gníomhaireachtaí eile ar fud oileán na hÉireann chun cur chuige comhchuibhithe i leith bithbhaincéireachta a chur chun cinn a uasmhéadaíonn leas an phobail, a chosnaíonn deontóirí, a chumasaíonn rochtain fhreagrach agus a chinntíonn inbhuanaitheacht fhadtéarmach
Bhunú agus úsáid nód den Néal Eorpach maidir leis an Eolaíocht Oscailte (NEEO) in Éirinn a chur chun cinn, chun timpeallacht ildisciplíneach oscailte agus iontaofa a chur ar fáil do thaighdeoirí inar féidir leo sonraí, uirlisí agus seirbhísí do thaighde agus nuálaíocht a fhoilsiú, a aimsiú agus a athúsáid.
Déanfaimid sármhaitheas a chur chun cinn inár mbeartais agus inár gcleachtais mhaoinithe taighde sláinte, agus tacóimid le cultúr folláin taighde agus nuálaíochta, tríd an méid seo a leanas a dhéanamh:
Chleachtais fhreagracha measúnaithe taighde a leabú a chuireann sármhaitheas, iontaofacht agus cultúr maith taighde agus nuálaíochta chun cinn, agus trí ár gcuid oibre sa réimse seo a roinnt
Phrionsabail FAIR (inaimsithe, inrochtana, idir-inoibritheacha agus in-athúsáidte) a chur chun cinn agus rochtain oscailte agus sonraí oscailte a thiomáint trí chomhoibriú agus trí obair i gcomhar le comhpháirtithe náisiúnta agus idirnáisiúnta
Phróisis taighde agus córais theicneolaíochta atá nua-aimseartha, éifeachtúil agus a laghdaíonn ualach riaracháin agus dramhaíl a úsáid
Oibriú le comhpháirtithe náisiúnta agus idirnáisiúnta chun tionchar a imirt ar chláir oibre beartais taighde atá ag forbairt, agus iad a chur i bhfeidhm agus a mheas, amhail slándáil taighde agus úsáid fhreagrach IS san eolaíocht
Chlár measúnaithe láidir a chur i bhfeidhm a chuireann fianaise ar fáil maidir le haschuir, torthaí agus tionchair ár gcuid oibre.
Tacóimid le taighde in Éirinn chun a chinntiú go bhfuil sé eiticiúil, cosanta agus ar mhaithe le leas rannpháirtithe taighde agus an phobail, tríd an méid seo a leanas a dhéanamh:
Thaighde ar mhaithe leis an leas poiblí a chumasú trí rialacháin agus cosaintí sonraí a chur i bhfeidhm tríd an gCoiste um Dhearbhú Toilithe Taighde Sláinte (CDTTS), le tacaíocht ón Rúnaíocht
Thacú leis na Coistí Náisiúnta um Eitic Taighde (CNETanna) chun tuairimí láidre náisiúnta ar eitic taighde a sholáthar maidir le taighde cliniciúil ar chógais, ar fheistí leighis agus ar dhiagnóisic, bunaithe ar shaineolas éagsúil fairsing agus ar eolas ó thaithí
Nósanna imeachta solúbtha a fhorbairt chun freagairt d’éigeandálaí sláinte agus do bhagairtí atá ag teacht chun cinn, agus trí thacú leis na CNETanna agus le CDTTS chun cinntí náisiúnta luathaithe ar eitic agus ar thoiliú a sholáthar, i gcomhréir le treoirlínte náisiúnta agus idirnáisiúnta
Threoir náisiúnta dea-chleachtais iontaofa, bunaithe ar shaineolas, a fhorbairt maidir le heitic, toiliú agus rialacháin a thacaíonn le taighdeoirí taighde sábháilte agus eiticiúil a dhéanamh
Thrédhearcacht a chinntiú i ndáil le hobair CDTTS agus CNETanna, a sheasann leis na caighdeáin is airde d’eitic taighde, de rialachas agus de chosaint sonraí ar mhaithe le leas rannpháirtithe taighde agus an phobail
Thábhacht rannpháirtíocht othar agus an phobail (ROP) a chur chun cinn in eitic taighde, i gcosaintí toiliú agus i dtaighde sláinte ar an iomlán, trí rannpháirtíocht le heagraíochtaí náisiúnta agus le baill ROP de CDTTS agus de na CNETanna.